《食評》牛扒先生 - 九龍灣店．Mr.Steak - Kowloon Bay
西餐篇 最近經常都做晚市半自助餐 食物都換過幾次餐單 唔同分店既價錢會有少許出入 我會話呢間係一間方便就腳既西餐廳 但唔係一間食材高級餐廳 食物 任食前菜 選擇幾豐富 佢每期換餐單都會有少少唔同 例如做日本和牛時就會有日本蔬菜咁 今期餐單比較普通 但我我都介紹下我拎左既野食 牛油粟米、胡麻醬青瓜、蕃茄、南瓜 以上食物都好新鮮 有少少調味 健康之選 南瓜煮法好特別 口感味道都好好 三款火腿、蜜桃鴨胸、薯仔沙律、煙三文魚螺絲粉、紅羅白配螺肉 火腿：味道唔錯 最細塊既比較咸 最薄身個塊肉味充足 蜜桃鴨胸：蜜桃好甜 配埋鴨胸咸咸既味道岩岩好 薯仔沙律：高質 味道調得好夾 煙三文魚螺絲粉：有好多三文魚 唔油膩 紅羅白配螺肉：螺肉同平時壽司食到既差唔多 我幾鐘意 是日餐湯：羅宋湯 入面配料好豐富 有好多野菜仲有牛肉 另外旁邊仲有幾款面包可以拎 美國安格斯西冷 $258 我叫要7成熟 但最後出黎得5成熟左右 食過幾次都有呢個情況 不過好在雖然5成熟 但完全無血水問題 每一啖都充滿肉汁 就算咬走左肉汁都唔會令肉既口感變乾 肉質唔差 牛味都夠重 個人覺得係比Ruby Tuesday個款398好 秘製醬烤焗英國豬背排 $178 份量幾大 但同Ruby Tuesday比較就細份啲 味道方面我覺得偏淡 肉唔入味 醬汁又唔夠多 食落似無味肉點汁 肉質方面普普通通 一半偏乾 較為孩口 另一半就尚算嫩滑 肉身都偏淋 好似浸左好耐水既感覺 下次再黎食可能會考慮其他食物 Ruby Tuesday既燒排骨出色啲 任食甜品 呢度就係全部甜品 甜品選擇比前菜少 由左上到右下講下 抹茶蛋糕：我唔太鐘意抹茶味 但呢款意外地幾好味 抹茶味偏淡 又帶有甘甜味 芒果芝士蛋糕：芝士味比較淡 芒果味全主角 幾好 朱古力冬甩：呢個正啊！ 朱古力味濃郁但唔會太甜 入面仲有朱古力醬 忌廉蛋卷：普普通通 同街外食到差不多 士多啤梨味係假甜 朱古力大福：煙煙unun口感好好 入面包左吉士醬 牛奶布丁：係張圖既右上角 好重奶味 鐘意奶味既記得食多幾杯 飲品 每人包一杯野飲 叫左芒果茶
