《食評》Beerliner German Bar & Restaurant – 黃埔 / Whampoa

德國餐篇

lunch set 基本上長期買一送一

間中晚市主菜會有半價 / 唔同優惠 

詳情可以打電話查詢

今餐大約每人$90

主菜份量大 食完飽到無位食晚餐

不得不提係午市有Häagen Dazs 雪糕任食

但有個唔好處(或者係好處)就係佢個餐單成日換

搞到前一日揀好食既野 第二日未必有

• 食物

是日餐湯配沙律菜

店員話係西蘭花湯 
我完全飲唔出有西蘭花味 味道似中湯 
好似平時屋企煲個種赤小豆扁豆綠豆 
而且個湯質感偏稀
上面有兩粒脆面包粒
實話實說 湯我係唔太滿意

沙律菜落左少少酸醋汁 
比胡麻醬健康且更開胃
不過菜比較碎濕濕 好似比人理爛咁 
整體黎講味道算係正常普通既

德式香腸拼盤配酸椰菜及燒薯

今次係我第一次食德國腸
個人認為呢間既腸幾好味 
要提醒大家德國腸味道係偏咸同偏重 (我平時食得淡)
全份食哂係會勁飽勁濟 
我覺得呢盤腸絕對可以分比三個人食

由於我對腸無深入研究
所以根據OPENRICE其他人既食評得知
呢到分別係雞肉腸、紐倫堡腸、豬肉腸、芝士腸
其實除左芝士腸外
其他我憑味道都唔知係邊款打邊款
所以直接用佢外觀形容咁比評價

黑點腸：
呢款有黑椒 但唔會好辣
肉質食入口有好多油 應該係用肥啲既肉製成 
所以入面會食得到一啲透明好似脂肪咁既野
皮好薄 幾脆

紅腸：
呢條就係有芝左係入面既芝士腸
同平時打邊爐食到既芝士腸唔同
係好咸好咸 亦係咁多款入面味道最咸既一條
估計係用偏咸既芝士製成 裡面既芝士比例都唔少
肉一樣係比較肥 皮係咁多條之中最爽脆

中腸：
呢條同黑椒腸既味好似　
但肉質結實好多 
亦食唔到肥膏 應該係用偏瘦既肉製成
味道無咁咸 食落亦唔會覺得好飽

小腸：
咁多條腸中最細條 同時亦係最結實
我個人覺得佢就係雞肉腸 無乜脂肪同油
味道都係最普通

酸椰菜：
酸酸地 可以用黎調劑番腸仔既咸味
又可以用黎僻味 等食下一條腸時可以食真啲個味

燒薯：
無任何調味料 所以食落係得薯仔既味道 


牛柳粒意式燴飯配青瓜及豆角

第一次食真．意式燴飯
以前食既一係唔夠熟 一係就變湯飯
呢個味道好濃郁！
奶味配合住少少既芝士味 好夾
而飯既濕度同熟度亦岩岩好 非常完美
佢既牛柳粒有勁多粒
可惜既係好似普通牛肉碎 肉質好瘦 唔嫩
亦無額外調味 只係靠燴飯個汁
始終佢既意式燴飯先係主菜
肉質方面算係可以接受既

Häagen Dazs 雪糕

今日有四隻味可以揀
忌廉曲奇、士多啤梨、比利時朱古力、雲呢嗱
由於我最鐘意食忌廉曲奇、士多啤梨
所以十分滿意今日安排 
佢另外有有唔少配料選擇可以加
例如核桃、花生、棉花糖、朱古力醬、士多啤梨醬 日日唔同
我食左六小球 好滿足！

飲品

餐牌上寫跟餐送汽水、熱飲 
但原來可以改叫果汁架！
分別叫左菠蘿汁同蘋果汁
兩款都勁好飲 無化學味道
就算冰溶左半都唔會變到好淡

• 環境

二人枱我覺得比較細張
但未到話無位放野食
侍應方面都幾好態度
不過有個侍應叫親佢做野
佢就叫其他人再過黎 唔直接黎幫手
枱與枱之間既位置空間我覺得一般 
唔會同其他人太近 但都可以聽到對方講野
環境佈置方面都幾靚 
但有樣野唔好就係明明佢地方都幾大下
食既人唔係好多 
但就硬係將客人迫埋哂一格仔入面坐
令到成個空間感覺好迫 
既然有咁多空位 二人都唔一定要坐二人枱
題外話：之前去CPK食野 佢呢方面就做得幾好

總括而言
野食係出面餐廳比較少見
湯、沙津菜及肉類水準普通
但意式燴飯正宗令人驚喜
腸類選擇亦多
有Häagen Dazs 雪糕任食加分！
而且食物分量極大份極飽
係可以一戰既餐廳
想帶女朋友慶祝／朋友聚會係一個唔錯既選擇！

地址 
紅磡船景街7號黃埔花園第四期棕櫚苑地下G10號舖 

電話 
2254 6178 

營業時間 
星期一至日． 12:00 - 23:00