《食評》土司工坊 - 大埔店．Toast Box - Tai Po

新加坡料理篇

一間係九龍新界都有分店既鋪頭

平時行商場實有見過

未食過既人對佢既印象可能係好貴既公仔面？ 

因為我自己以前都係咁 

點知食過一次先知佢有原來有好多野好食！ 

• 食物

叻沙 $50

只可以講佢既叻沙超岩我口味！
土司工坊既叻奶味比較香濃 
同時甜味及辣味互相配合
所以唔食辣既人都接受得到
比例上全部做得好好　
所以每次食都好味到會飲哂個湯底 
米線質感軟滑 唔會太乾或者太硬
不過整體既份量唔多 大食人士可能唔夠飽
配菜方面
一碗包括兩隻去左殼蝦、五片魚蛋、半隻蛋、4~5件切半豆卜、牙菜
蝦：算大隻 但雪藏蝦唔會太有蝦味
魚：蛋切薄片 夠爽口彈牙
蛋：普普通通 半熟程度 但不是溏心
豆卜及芽菜：配料份量算多 連湯食好味 

傳統吐司 咖椰配牛油味 $16

咖椰簡單黎講就係一種椰子果醬
味道係有少許甜味加上少許椰香味
係新加坡黎講好普遍 
一般係香港就只有新加坡料理或者馬來西亞料理的餐廳先有賣
多士裡面既牛油亦落得好重手 每件都有成塊 
面包亦烘得岩岩好 唔會太燶 少少脆 上台時仲熱辣辣 

炸蝦尾 $18

見呢款係最近新出
好奇就叫左個黎試下
外皮好油 食入口都份咀油 
蝦身雖然大隻啖啖肉
但都係雪藏蝦 所以無乜蝦味
不用嘗試

小魚椰漿飯
另一樣我覺得值得推薦既主菜
可以配雞翼或者雞脾
佢飯旁既醬又係味道調得岩岩好
一樣係甜加辣互相配合 非常開胃
比例做得非常好
不過整體來說偏辣 不能食辣的人可以放棄

娘惹米線 $49
這是我不太推薦的主菜
除非你喜歡酸及杰的湯底
湯底係偏酸 酸中有少許的甜味 
湯底好濃郁 所以非常杰 好漿口 
我個人從味道到質感都唔太中意食
上面只有啲花生芽菜魚蛋 
配菜亦無叻沙咁豐富

肉鬆吐司 $18
一塊好厚既吐司
在上面查一層牛油再鋪上肉鬆
再加上少許煉奶烘乾
牛油及煉奶的甜味同肉鬆的咸味非常配合 
面包經烘過後亦做到外脆內軟
口痕時經過必食

順帶一提
我個人係唔建議食套餐
因為面飯類既套餐等於加6蚊多一杯野飲
而包類既套餐就係貴一倍價錢多兩隻蛋加野飲
要食既人可以自行考慮

總括而言
佢係我食過既新加坡餐廳中最好味既一間
曾經食過full house及星洲名廚
兩間的叻沙都不及土司工房好
full house的小魚椰漿飯亦不是我喜歡的口味

呢間餐廳唔加一
又可以慢慢坐慢慢食無人趕
唔知食咩或者口痕時建議比次機會一試

地址 
大埔安邦路9號大埔超級城C區地下539-541號舖